ବଦଳୁଛି ଭିକ ମାଗିବାର ଟ୍ରେଣ୍ଡ: ପିଲାଙ୍କୁ ଭଡ଼ାରେ ଲଗାଇ ଟଙ୍କା ଆଦାୟ, ବ୍ରହ୍ମପୁରରେ ୯ ଶିଶୁ ଉଦ୍ଧାର ଓ ୫ ଅଭିଯୁକ୍ତ ଗିରଫ

ସୂଚନା ଅନୁସାରେ, ଏହି ଚକ୍ର ବ୍ରହ୍ମପୁର ସହରର ବିଭିନ୍ନ ଟ୍ରାଫିକ୍ ସିଗ୍ନାଲ ଓ ଭିଡ଼ ଅଞ୍ଚଳରେ ଶିଶୁମାନଙ୍କୁ ଭିକ ମାଗାଇ ଟଙ୍କା ଆଦାୟ କରୁଥିଲା। ସକାଳ ସମୟରେ ଅଭିଯୁକ୍ତମାନେ ଅଟୋରିକ୍ସାରେ ପିଲାମାନଙ୍କୁ ନେଇ ସହରର ବିଭିନ୍ନ ସ୍ଥାନରେ ଛାଡ଼ି ଦେଉଥିଲେ। ପରେ ସେହି ପିଲାମାନେ ଗାଡ଼ି ଚାଳକ ଓ ଯାତ୍ରୀମାନଙ୍କୁ ଭିକ ମାଗୁଥିଲେ ଏବଂ ସନ୍ଧ୍ୟାରେ ସଂଗ୍ରହ କରାଯାଇଥିବା ଟଙ୍କା ଅଭିଯୁକ୍ତମାନଙ୍କୁ ଦେଇଥିଲେ। ଅଭିଯୁକ୍ତମାନେ ଦୂରରୁ ଦାଁଡି ରହି ପିଲାମାନଙ୍କୁ ନଜର ରଖୁଥିବା ପୋଲିସ ତଦନ୍ତରେ ଜଣାପଡ଼ିଛି। 

ଗୁପ୍ତ ସୂଚନା ପାଇ ପୋଲିସ, ଜିଲ୍ଲା ଶିଶୁ ସୁରକ୍ଷା ୟୁନିଟ୍ ଓ ଚାଇଲ୍ଡ ୱେଲଫେୟାର କମିଟିର ଏକ ଯୁକ୍ତ ଟିମ୍ ତଦନ୍ତ ଆରମ୍ଭ କରିଥିଲା। ପରେ ପ୍ରମାଣ ସଂଗ୍ରହ କରି ଅଭିଯୁକ୍ତମାନଙ୍କୁ ଧରାଯାଇଥିଲା। ଉଦ୍ଧାର ହୋଇଥିବା ଶିଶୁମାନଙ୍କୁ ଚାଇଲ୍ଡ ୱେଲଫେୟାର କମିଟି ସମ୍ମୁଖରେ ପ୍ରସ୍ତୁତ କରାଯାଇ ସୁରକ୍ଷା ଓ ପୁନର୍ବାସ ପାଇଁ ଶେଲ୍ଟର ହୋମକୁ ପଠାଯାଇଛି। ପୋଲିସ ଏହି ଘଟଣାରେ ଆହୁରି ତଦନ୍ତ ଜାରି ରଖିଛି।